يا ترى لسه فاكر

يا ترى لسه فاكر
اد ايه كنت بافكر فيك
ازاى كنت عايشه بيك وليك
اد ايه كانت نظرة منك
تنور حياتى بيك

كنت بحلم اكون بين ايديك
زهرة حلوة عبيرها كله ليك
نجمة فى السما عالية
تبعت تنورها وغرامها بس ليك

فاكر كلامى ليك
كان حنين ازاى وليه
والا نظرة عينيا
كانت مليانه شوق ولهفة
لما تقرب والا تسأل من بعيد

كنت باتجنن لما تغيب
عن عنيا ولا اعرفلك طريق
وافضل طول الليالى اسأل
ياترى فاكر حبيبه
والا البعد اساه عليه

فاكر لما بقيت بتغضب
متلاقيش غير ايدى تطبطب عليك
ولما تتعب بس قلبى يسهر عليك
وحتى لما تهجر روحى تجرى عليك

كل كلام الغرام كتبته ليك
ووصيت عليك النجوم والقمر
تسليك فى الوحدة والسهر
وطول نهارى وليلى
ماليش فكر الا فيك

مش عارفة اقولك تانى ايه
انا فى بعدك كتاب حزين
كل كلامه غناوى انين

انا فى غيابك حروف من غير معانى
زهرة جفت وقع ورقها فى برد الليالى
قمر حزين دموعه تنزل تواسى كل السهارى
فراشة نسيت طريقها للنور وغابت عن العيون الحيارى

هاقولك كلمة واحدة
يا طول ليلى الحزين
يا قلبى اللى اتحرق
من كتر الشوق والحنين
يا عمرى اللى ضاع
بين هجر وبعد وعذاب الانين

هاحبك واخبى عن روحى حبك
ولو سألت نفسى عنك
هاقول كان امل وضاع
فى الغربة والليل الطويل

_________________

جامد اوى
شكرا ليكى

ميرسيه يا مستر زوما